ഐപിഎല്ലിൽ ഇന്ന് ആവേശകരമായ മത്സരത്തിൽ ഡൽഹി ക്യാപിറ്റൽസ് രാജസ്ഥാൻ റോയൽസിനെ നേരിടും. ഓസ്ട്രേലിയൻ സൂപ്പർ താരം മിച്ചൽ സ്റ്റാർക്ക് ഡൽഹി ക്യാപിറ്റൽസിനായി കളിച്ചേക്കും.
തോളിലെ പരിക്കിൽ നിന്ന് മുക്തനായ താരം ദിവസങ്ങൾക്ക് മുമ്പ് തന്നെ ടീമിനൊപ്പം ചേർന്നിരുന്നു. മൂന്ന് മാസമായി മത്സരരംഗത്ത് നിന്ന് വിട്ടുനിൽക്കുകയാണെങ്കിലും ഡൽഹി നെറ്റ്സിൽ താരം സജീവമായി പന്തെറിയുന്നുണ്ട്.
തുടർച്ചയായ മൂന്ന് തോൽവികളിൽ തളർന്നുനിൽക്കുന്ന ഡൽഹിക്ക് സ്റ്റാർക്കിന്റെ വരവ് വലിയ ആശ്വാസമാണ്. കഴിഞ്ഞ മത്സരത്തിൽ ആർസിബിക്കെതിരെ വെറും 75 റൺസിന് പുറത്തായ ഡൽഹിക്ക് ബൗളിങ്ങിലും കാര്യമായ ചലനമുണ്ടാക്കാൻ സാധിച്ചിട്ടില്ല.
ഈ സീസണിൽ പവർപ്ലേയിൽ വെറും ഏഴ് വിക്കറ്റുകൾ മാത്രമാണ് അവർക്ക് വീഴ്ത്താനായത്. രാജസ്ഥാന്റെ കരുത്തരായ ഓപ്പണർമാരായ വൈഭവ് സൂര്യവംശിയും യശസ്വി ജയ്സ്വാളും നൽകുന്ന വെല്ലുവിളിയെ സ്റ്റാർക്ക് എങ്ങനെ നേരിടുമെന്നാണ് ക്രിക്കറ്റ് ലോകം ഉറ്റുനോക്കുന്നത്.
അതേസമയം, പഞ്ചാബ് കിങ്സിനെതിരായ തകർപ്പൻ വിജയത്തിന്റെ ആവേശത്തിലാണ് റിയാൻ പരാഗ് നയിക്കുന്ന രാജസ്ഥാൻ റോയൽസ്. 223 റൺസ് എന്ന കൂറ്റൻ ലക്ഷ്യം മറികടന്ന അവർ പോയിന്റ് പട്ടികയിൽ ഒന്നാമതെത്താനുള്ള ലക്ഷ്യവുമായാണ് സ്വന്തം തട്ടകത്തിൽ ഇറങ്ങുന്നത്.
പവർപ്ലേയിൽ അതിവേഗ പന്തുകളുമായി ബാറ്റ്സ്മാന്മാരെ വിറപ്പിക്കുന്ന ജോഫ്ര ആർച്ചറാണ് രാജസ്ഥാന്റെ പ്രധാന കരുത്ത്. ഈ സീസണിലെ പവർപ്ലേ ഓവറുകളിൽ മാത്രം ആർച്ചർ ഒൻപത് വിക്കറ്റുകൾ വീഴ്ത്തിയിട്ടുണ്ട്. ബാറ്റിങ്ങിനെ പിന്തുണയ്ക്കുന്ന ജയ്പൂരിലെ പിച്ചിൽ മറ്റൊരു കൂറ്റൻ സ്കോർ മത്സരത്തിനാണ് കളമൊരുങ്ങുന്നത്.
Content highlights:mitchell starc returns for delhi-capitals vs vaibhav suryavanshi rajasthan royals